Jäidn Douch is nedd suvill luus be uns

Veröffentlicht am 08.07.2026

Biggi liest die Geschichte selbst

Mei Engldochder schrebbd in unnerer Grubbm, dess sie heud früh aufm Wech nei die Ärberd is und ihr Freund woer nuch dahamm. Dou glinglds, wall der Bosdbuud a Bäggla ougehm wolld. Es hodd na wull ze lang gedauerd, wallers vor die Hausdür geläichd hodd, und wie ihr Freund die Dür aufmachd und dess Bäggla nimmd, hautsesa zu, er hodd dess Bäggla in der Händ, khanna Schuh drô und khann Schlüssl debei. Be die Nochbern hoddes ah gedauerd, bis die khörd homm, wall die nuch fesd ômm Schloufn woern. Dann dorfder durch ihrn Wohnzimmer auf enna ihrn Balkon und dann rüber grabbln auf sein.
Mir homm ja su gelachd und gsochd, schoud, desser scho ôgezuung woer.
Dann mach ich Brôdkhadoffln und dann schelldess be mir. Es is die Bosd und er suched a Fraa, die nedd dou wohnd, ob ich die khenna däid? Ich gi die halba Drebbn nou und na endgeche, dou hauds die Dür zu und ich deng bluß ô meina Brôdkhardoffln. Ich hobb kha Handy debei und er will mich gleich amoll delefoniern lossn, waller dengd, desser edds drô schuld is, obber ich khenn kha ahnzicha Delefonnummer ve meina Leud. Ich bi strümpfed und du erschd amoll im Drebbnhaus alla Sicherungen raus, bevor die Ärbfl verbrennd senn. Dann hogg ich mich ze meiner Nochbera und hoff, dess mei Gunger, fer denn dess Middouchessn is, ah ann Schlüssl debei hodd, wenner khummd. Bügdlich woerer dou, khonnd aufspernn, hodd gessn und is dann widder auf sei Ärberd.
Wie ich späider ford mussd, sich ich, desser sein Schlüssl ve außn sdeggn lossn hodd. Su khummd er heud dahamm ah nedd nei!