Es is zenn verrüggd wern

Veröffentlicht am 01.07.2026

Biggi liest die Geschichte selbst

Mei Gfrierschrong gibd Alarm. Immer widder. Alla 50 Sekundn quieschd dess Ding, dess mer die Ohrn wieh dunn. Ich ziech denn Stegger und ward. 50 Sekundn späider schrilld dess scho widder. Wedder nei, ohna Sdrom, deng ich. Ich läich a Dermomeder nei, sdegg denn Sdegger nô, hör wie der Modor ôlöffd und sich dann selber ausschald. Alles gans normôl. Auf´m Dermomeder senn 20 Grôd minus. Dess is doch alles in Ordnung, wos willer denn? Dann such ich dess Handbuch. Sdedd nix Neus drinna, dess wass ich alles scho, und khein Word ze mein Alarm. Indernedd, die Reddung. Dord will die Firma AEG wissn wie der Schrong haasd, odder woss er fer Nummern hodd. Ich find nix. Velleichd auf der Rüggseidn? Ich grads benn Verrudschn denn gansn Fußbudn zamm, obber hindn sich ich ah nix. Es khönned ah sah, dess der Schrong aweng schief sdidd, also ärber ich edds mid der Wasserwouch und läich ann Khaal drunder. Der Alarm gedd nouch wie vor. Als ledsda Möglichkheid, bevor ich denn Khundndiensd ôruf, solled ich denn Schrong ausramma und ôbdaua, dann alles widder eiramma und edds müssed der Alarm ausgeh. Also, du ich alles raus, sdells aufm Balkhon, is ja khold draun (Januar) und dau obb. Die gansa Zeid hodd dess Ding khann Sdrom, schrilld obber immer nuch alla 50 Sekundn. Ich ruf mein Bumm ô. Der schiggd mer su a Handbuch außm Indernedd, obber dou is ah nix Neus debei. Wie der Schrong obdedaud is, ramm ich alles widder ei, sdegg denn Sdrom ô und ward. Dess dauerd edds aweng, bis alles runder gekhühld is, dann gibbd der Alarm a Ruh und ich gi ins Bedd.
Ze Früh, wie ich mein Kaffee dring, gedd der Zirgus widder luus. Mir werd´s gans schlechd. Ich verdreh die Aang und schau nauf die Degg. Dou sich ich benn Rauchmelder a Lichdla ôgeh und im gleichn Momend schrilld der Alarm.
Edds hou ich mer ann Haufm Geld gsboerd, wall der Khundndiensd hädd merrer gekhosd, wie a neuer Rauchmelder.