DER BIGGI IHR BLOG

Schobbm

...mir woern heud eikaafm.

Meiner und ich.

Er sichd a Husn fer 3,99 €

Ich könned scho die Händ übern Kubf zammschloung, dou sôchd er, dass dess a schöss Gscheng wär, fer sei Schwesder.
Dou fährd er näxda Wochn nô.

Ich deng, ich schämed mich ze Duud, su a billicha Husn mid ze brenga, do sôchd er scho, hobb, ziech sa moll o, du hosd die gleicha Figur.

Auf der Husn stedd: 52
Ich deng, dass dess a Frechheid is.
Su digg bi ich a widder ned.
Wie ich nei die Kabina gi, roll ich gscheid mid die Aang.
Dou hodder obber nix devo, wall er mich ve hindn gor ned säing kho. 
A Hidds in dem Loudn und ich muss mich aus- und ôzieng. 
Des hodd mich dann obber gscheid geärcherd, wie die Husn gebassd hodd.
Du kosd nedd nouch der Größ geh, ho ich ze na gsochd, die machd a jeder Fabrikand wie er mahnd. Drodsdem hodd mir des gelangd.

Wie ich mich dahamm auf die Wouch gsdelld hou, dou woer mir dann der gansa Douch versaud.

Biggi