DER BIGGI IHR BLOG

Die Sucht

...meiner fährd an Zweisidser. Und wall er neulich mid zwa ve unnera Bumm auf Bareidh wolld, hodder sich ve unnerm middlern Sohn des Audo gehm lossn, demidd sa alla auf amoll nei bassn.

Wie sa die Audoschlüssl dauschn, sochd unner Bu ze na:
„Vodder, des is a Nichdraucher Audo und die Scheim auf der Fohrerseidn, die kosda nedd aufmachen, die glemmd."

Es is November und scho a weng kôld.
Wie sa widder hamm kumma, senn sa rechd ausgfrorn und homm ruda Nousn.
„Deina Kinner friern", sochd meiner.

„Die wern Hunger homm", mahn ich und degg den Diesch.

Dauernd lachn sa, soung obber nedd worum.
Wie unner Middlerer rei kummd, druggsn sa alla rum.

Bis der Vodder sochd:

„Los, sôchd na moll wossder widder gemachd hobbd!"

Sie dunn su lang rum, bis der Jüngsda mahnd:

„Dess Fensder auf der Beifohrerseidn gedd nimmer zu."

„Zewoss hobbders denn aufgemachd, dess is doch kôld draußn?"

Wie der Vodder sochd:

„Die wolldn hald amoll nausschaua", dou schreia sa groud naus.

Die Woherheid is nie rauskumma, obber ich koss mir scho dengn!!!

Biggi