DER BIGGI IHR BLOG

Urlaub - 1

Scho lang wolld ich mid meina Leud amoll widder midn Audo in die Dürkei fohern, über Ösderreich, Ungarn, Serbien und Bulgarien.
Su wie früher hald - dreiahalbdausnd Kilomeder im Audo - ohna Hodell und immer bluß fohern.
Dess hommer eds im November gemachd.
Erschd wommer obber in Neimaggd in der Oberpfoiz auf ann Gebordsdouch und dann is a scho luus ganga, fasd auf die Sdund, wie geblônd.
Ohna Brobleme semmer durch Ösdereich und korz vor der Grenz hobbich a Machdword gsbrochn und gsochd, dessmer eds ôhaldn und aweng schloufn.
Ich bi der Beifohrer und füll mich immer su verandwordlich, dessder Chafför nedd eischläifd und in derrer Bossidion grich ich selber ka Aach zu.
Also müssmer Bause machn.
Worn a bluß vier Sdund, obber ́s hodd alla gud gedôh.
Di Sunna gedd dou scho eher auf als bei uns und es wor a richdicha Sunna und ob dou wor nuch amoll Summer.
In Ungarn und Serbien konndmerr überoll kosdnlos auf ́s Glou.
Ich souch ze mein: „Schau moll wie sauber die Doileddn senn und zegoer omm Sdrossnrond lichd fasd ka Dreeg. Worum issn dess su annerschd wie früher?“
Sochder, wall die Dörng eds middn Fliecher hammfohern. Die homm früher die gansa Sauerei gemachd.
In Beograd (Belgrad) fährd unner Jüngsder wie die annern hald a mid 89kmh in die Haubdstodd und werd ve der Bollizei rausgezuung.
Er soll midd die Babiere aussdeing und zenn Bollizeifoherzeuch geh.
Ka Minudn sbäder is meiner a scho draußn und will denn ann Bolizisdn mid 15 Euro besdechn.
Die lachn na bluß aus. dess is enna ze weng. 200 Euro wolln sa houm.
Dou lachd meiner.
Sie einichn sich midd aweng dörgisch/serbisch/deutsch auf 40 Euro - ohna Quiddung und mir fohern weider. Der Sbridd is günsdich - also werd gedangd.
Ich sidds im Audo und sich wie meiner bei der Kassa 60 Euro nôlechd.
Der Kassier zeichd na freundlich auf ann Monidor, wie der Kurs sdedd.
Und auf amoll is der 50 Euro Schein wegg.
Ich hör bluß, dess dess laud werd und schigg unnera zwa Bumm mid nei.
Eds senn sa ze dridd. Unner Grußer hodd denn Kubf rasierd und su Gängsder Glamoddn ô.
Wie er hinder die Dhegn gedd und schaua will wu der anner den Schein hie hodd, fängder dess schreia ô, voweche "Police".
Do erschd werd meiner wüdich und alla drei gänga sa auf den Serbm luus und scho is der Geldschein aufgedaucht!
Auf amoll wollder bluß nuch drei Euro homm - woss a rechdns wor.
Ob edds werd im Audo geraachd!

Biggi