DER BIGGI IHR BLOG

Urlaub - 2

...mir sänn ô der Grenz Bulgarien/Dörkei.
Vor uns stänga 5-6 Audos und es gidd nix vorwärds.
Dou nimmd mir meiner mein Bass wegg und sochd, dess dess nuch lang dauerd und er gidd schnell nein Djudi Frie Schobb und kaafd Zigereddn.
Und er iss gleich widder dou.

Und scho gedds schnell und mir senn drô und ich hobb kann Ausweis, weil meiner ja weche seiner Suchd underwegs is.
Mir haldn denn gansn Verkehr auf.
Wie er widder kumma is, hobbich mich richdich gfreud, wie scho lang nimmer.
In Izmir hommer ann Zwischnsdobb be der Dande gemachd. Die hodd gedochd mir bleim über Nochd, obber meiner wolld bardou weider und hodd lauder su Ausreden khobbd.
„Die" däidn dess Audo ausraum. Dess hodd die Dande nedd geldn lossn.
No sochder „Die" däidn dess Audo aufboggn und die neua Reifn glaua.
Wie mir dann alla nunder sänn und weider fohern wolldn, dou sdänga Audos midd vill bessera und deurera Raafn dord und kanner hodd Angsd drumm khobbd.
Es wor hald a Ausred, waller weider wolld.
In der Nochd hommer gedangd. Meiner stedd neben Dangward under demm Schild wu Rauchverbod stedd und qualmd. Die Gunga machn na drauf aufmergsam, obber er lachd bluß und sochd: Marlboro brennd nedd su schnell.
Unglaublich!
Dann hommer wunderschöna Douch be 30-32 Grôd khobbd. Nochds hodds obber ôbgekühlt auf 19 Grôd und die Schwäichera hodd gsochd, dess ich dess Fensder nochds zumachn soll, sunsd werred ich grong. Wi ich gsochd hou, dessich zegoer be 20 Grôd minus im Schloufzimmer des Fensder auf hobb, dou hodd sa ochgoddochgodd (allahallah) gsochd.

Biggi