DER BIGGI IHR BLOG

Urlaub - 3

...dann hommer wunderschöna, worma und sunnicha Douch be 30 - 32 Grôd khobbd.
Mir senn ins Meer, worn be der Dande Abflsiena bflüggn, homm a haufn Leud besuchd und nochds, bismer nein Bedd sänn aufm Balkon khoggd.
Jedn Douch hommer woss undernumma und die Zeit woer rum, wie im Fluch.
Wall ich ned sulang Urlaub grichd hobb, mussd ich zwa Douch eher midn Fliecher widder hamm.
Früh um 2:00 hobbich mein dreimoll aufgeweggd.
Er sochd, dess is a Inlandsfluch, dou mussmer nedd subald dou sa. No semmer hald in aller Seelnruh durch die Stodd und widder naus zenn Fluchhafn.
Meiner wolld widder wos sboern und is im dodalen Haldeverboud sdehgebliem, wall drinna der Bargblodz mid Geld woer. Defür mussd mer dann um halm Fluchhôfn rummlaafn.
Die gansa Mannschafd woer in Aufruhr, wo ich bleim däid.
Eds dud meiner heggdisch:
Wu issn dei Besdäidichung und wu dei Bass, eds aweng schnell!
Dou dengn doch werglich alla, dess ich die Schlofkabbm bi.
Er drüggd merr des Digged nei die Händ, ich drügg schnell die Kinner und er schibbd mich durch die Basskondroll. Dess gidd alles su schnell, dessich keinen Gnubf dörgischs Geld debei hobb und fünfahalb Sdundn aufm isdanbuler Fluchhofn die Leud benn Essn und Dringd zuschaua kô.

Dess ichs dann ferdich gebrochd hou mid fünfahalb Sdundn Aufendhald denn ahnzichn Fliecher, der ô dem Douch noch Nermberch ganga is ze verbassn, iss a annera Gschichd und die werrich in meim Lehm nimmer vergessn.

Biggi