DER BIGGI IHR BLOG

Stanich

...mir homm ann Ausfluch auf Stanich gemachd und senn nein Aldersheim.
Mein Godd, dess woer debremiernd!
Hammwärds sochd die Danda ze ihrn Mô, läss amoll die Biggi foehrn.
Ich hobb obber ka Lusd khobbd.
Mir wolldn nuch auf Werschberch und ihrn Gunga und sei Freundin obhulln, die wu dou im Schwimmbôd woern.
In Schorcheds will a Audo lings oubieng und der Ongl fährd sdoggvull drauf zu.
Alles häld die Lufd ô, er reisd des Sdeuer rechds rum und fährd mid
Vollgas ô dem Audo vorbei.
Sixdes, sochd die Danda ze mir, dessweche wolld ich, dess du fährsd.
In Werschberch woer dess aufm Wech zenn Schwimmbôd aweng eng und dann kummd uns a nuch a Bus endgeche.
Der Ongl schaud denn Fohrer ô und der schaud a nedd vill gscheider raus.
Ich souch, du bisd a Audo und der is a Bus, sedds hald zerügg.
Soford hauder denn Rüggwärdsgông nei und fährd fasd nô die Mauer.
Dann rangschierder nuch a weng und der Bus kô vorbei.
Mir fohern bis zenn Eingông, dann kummd a Schild auf dem sdedd, dess die Einfoherd verbudn is - und er fährd nei.
Die Danda sochd, hosdes nedd gelesn? KEINE WENDEMÖCHLICHKEID!
Er sochd, er woer heud früh scho dou und er kenned sich aus.
Dann drehder auf der Wiesn um und fährd vorn Eingông.
Aufm Hammwech hommsa die Musigg su aufgedrehd, desser mid 90 kmh im driddn Gong gfohern is, waller nedd khörd hodd wie der Modor laud woer.
In Kulmboch foher mer mid Karacho auf die Ambl zu und wie dess auf Gelb schald, hauder eine Vollbremsung nô, dessmer alla in die Sicherheidsgurde hänga.
Worum hosdn du eds dou su orch gebremsd? Dou wermer doch nuch leichd durch kumma?
Heud früh bi ich be roud über die Ambl und dou hodds a nedd gebassd, wie merrs machd isses verkehrd!

Die gansa Zeid erzilld er uns woss ve Fahrsicherheid und dessa in Idaljen 24 Sdundn mid Lichd foehrn und mir lieng aufn Rüggsids und senn halbduud ver Angsd.

Biggi