DER BIGGI IHR BLOG

Kino

…Samsdouch Ômbds is dess Kino ausverkafd.
Drei Leud kumma und wolln ihra reservierdn Karddn ouhulln. Leider senn die scho vergehm - ô annera, die hald scho eher dou worn.
Sie käimedn aus Bareid und suwoss häds dou nonnich gehm.
Sie senn VIP und dou dörfn ihra Diggeds erschd weider gehm werrn, wenn der Film groud luus gedd.
Alles is möglich, obber dieBläds senn hald eds weg.
Och Goud, worn die böis!
Wimmer sich ner su aufräing mouch?
Dann rufm sa mich im Büro ô.
Die machn mich richdich ferdich.
Jedesmoll wenn ich mid ann sbrich, gadsn die zwa annern ve hindn nei.
Ich souch velleichd 15 moll, dess mir dess eds leid dudd, obber es is hald amoll bassierd.
Dou dörfed ich mir woss eifalln lossn, zer Widdergudmachung, schreia sa ins Delefon.
Ich deng: Audo? Eigenheim, woss derfs denn saa?
Wie sa aufgeläichd homm, schreib ich enna ann Brief, dess dess hald a menschlicher Fehler woer und schreib dessich a a Freikardn middezu läich.
Ômm gleichn Ômbd gidd der Brief auf die Bosd.
Und omm Mondouch middouch hommsa sich scho in Bareid beschwerd.
Mir is nämlich die ahna Freikardn widder rausgfalln, die hobbich dann in die Briefmargn gfunna.
Dou woers merr dann su richdich beinlich.

Biggi