DER BIGGI IHR BLOG

Titel geändert. (Sunsd liesdes widder kanner!!!)

Wenn ich scho moll büngdlich wu bi...
Leider konnd ich erschd Middouch dou sah, wie die Buschglobfer: "Der Dieb, der nicht zu Schaden kam" aufgführd homm. Mir homm ja su gelachd, dess Stügg is wunderboer. Der Rüdi Baumann als Idaljener, wu in Kulmboch lebbd - sdorg!
Dann a Leseblogg, dann widder Dheader und dess woer dann aweng lang. Bevoers ôhganga iss, hobbich mer schnell nuch woss zenn dringn khulld und wiich widder in die Scheuna kumm, hoggd a Mô auf meiner Jaggn. Die homm groud ôhgfangd, dessweche hou ich bluß dess Drumm under sein Oersch weggezuhng, hobbna a boer Aang hie gedrehd und hobb a Bäggla Daschndücher ve an annern Sdull rougschmissn und mich drauf gsedsd.
Der Dannhäuser hodddie Leud a orch guud gfalln, obber dann is der 75.Gebordsdouch aweng lang worn, sulang, dess nedd bluß ner ich ze kämbfm khobbd hou.
Ich konnd nimmer sidsn. Aufsdeh konndich a nedd, dann wär doch mei Blods weggewehn.
Ich solld um viera vorlesn. Zwa Sdund sbäider woer ich drôh.
Mir worn zwa Frauen und a Mô.
Die Äldera dorfd ôhfanga.
Der Mô hoggd in der Middn und su hodds aweng gedauerd, bissich merg, dessdie aus am Buch vorliesd. Die hodd nimmer aufghörd, die Leud senn reihenweis eigschloufm und sie hoddes gnadenlos durchgezuhng!
Wie des Buch ze End woer, hoddsa gfrochd, obsa nuch woss vorlesn derfed. Godd sei Dang hommsa dess underbundn. Hinderher hoddsa gsochd, es wär fer sie es ledsda Moll gewesen, wall sie scho 82 is. Hobbich gsochd, dess is doch ka Garandie. Ich hobb su a Wud khobbd, ich wolld scho aufsdeh und hammgeh. Der Mô hodddann a Gedichd vorgelesn, wu a Fraa in Bamberch auf ann Blods brunnsd und ann Furz läßd. Leider konnd ich dess Niwoh nedd eraing, obber die Leud homm be mir a gelachd.

Biggi