DER BIGGI IHR BLOG

Meiner Shanigwa ihr Gebordsdouch

Gesdn woer a richdich haßer Summerdouch und Maria Himmlfoehrd.
Dou simmer auf Neimargd in der Oberpfoiz auf ann Gebordsdouch.
Scho wiemerr kumma senn hodds Middouchessn gäim und gleich denouch Kaffee und verschieda Kung und Dorddn.
Wemmer denouch nedd aweng sbaziern ganga wärn, häddmer es Ôhmbdessn goernimmer neigrichd.
Su hommer uns aweng auf ann Kinnersbillblods (ich ah) ausgedobbd und dann semmer aufs Volgsfesd. Dord biich midd meiner Schwiecherdochder (wallsich weider kahns gedraud hodd) nei su ann Foehrgschäfd, dess hodd glaabich Bräigdäns khaasn. Erschd mussdmer a halba Sdund in der Sunna warddn, bis nuch a boer Leud kumma senn, und ich ann gnallruudn Kubf grichd hou und dann is dess luusganga, dess ann Hörn und Säing verganga is.
Der Scheff ve denn Loudn wolld wull aweng Reglame fer sei Zeuch machn, wall die Foehrerei goer nimmer aufkhörd hodd. Dauernd hodder neis Migrofohn geblägd, dess dess edds nuch schneller werd und desser edds nuch amoll richdich Gas gibd zerr ledsdn Rundn.
Mir homm überlebbd und ich bi auf unnern Kinnerwoung zu gedorgld, hobbmich drô fesdgegralld und gsochd, dess ich eds foehr. Ich glaab die Schwiecherdochder häddna a gern khobbd, wolldsich obber keine Schwäche sbüern lossn.
Und die Leud hommich ôhgschaud, wieich midd mein rudn Kubf ô denn Kinnerwoung häng - die homm alla gedochd, ich bi besuffn.

Biggi