DER BIGGI IHR BLOG

Landesgaddnaussdellung in Bamberch

Gesdn hobbich mid meiner Nochbera ann Ausfluch gemachd.
Wedder senn mir Kilomeder geloffm!
Gscheiderweis hobbich nouchm Frühsdügg nuch ann halm Lidder Wasser gedrungn, demmidich nedd gleich underwegs woss kaafm muss.
Dou semmer dann scho in Bamberch es erschdamoll auf die "Öffendlichn".
Ich sdi ôm Waschbeggn, wie mei Nochbera hinder mir vorbei is.
Nô, frouch ich sa, obsa nedd ihra Händ waschn will?
"Dess hodd doch überôll su sauber gerochn."
Wusa rechd hodd, hoddsa rechd.
A Wehder wie im Bilderbuch und fasd 30 Grôd. Ich hou alles aweng fodografierd und dann hodd mei Nochbera a Bild ve mir gemachd, wiich auf ann aldn Bolizeimodoerrôd mid Beiwoung sids. Wiich widder rou wolld, mussd merr a Bolizisd behilflich sah, sunsd hädd ich fasd dess gansa Foehrzeuch umgelechd.
Mei Nochbera woer su erschroggn, desses nedd amoll fodografierd hodd.
Dann semmer eigekehrd.
SELBSDBEDIENUNG.
Mei Nochbera hodden Kaffee khulld und ich hobb die Bläds besedsd.
Wiesa widder dou is, frouch ich nouch die Löffl?
Die hoddsa vergessn, hulld obber gleich welcha.
Kaum issa zerügg, frouch ich, wu hosdn du denn Zugger?
A vergessn.
Sie brenngd zwaa Bäggla und dou woer ja su weng drinna - EINE FRECHHEID - be drei Euro, die Dassn.
Ich du zwaa Zugger nô und rühr gscheid um.
Pfui Deifl na, dess woer Solz!
Sie konnds nedd glaam und mussd a moll brobiern.
Und desweche hommer su ann Dorschd grichd, dessich Ômbds gleich be ihr ahns dringn mussd.
Du hosd gedochd, mir homm Solzhering in Bamberch gessn.

Biggi