DER BIGGI IHR BLOG

Ausfluch mid Händy

Meiner is gesdn mid mir noch Aaln gforn, unner Schwiecherdochder besung.

(Meina Gunga soung mannixmoll zemir: "Ze woss brauxdn du a Händy, wennsda nedd nô gesd?" Ich brauch kahns und hobbmir a kahns kaafd, es woer a Weihnochdsgscheng!)

Also, mir senn underwechs und a halba Sdund vor Aaln rufd die Schwiecherdochder mich auf mein Händy ô, wie lang mir nuch braung, wall dann däid sa midd uns ihr Middouchsbause machn. Ich souch in dreißich Minudn semmer dou und mir dreffn uns aufm Friedhof.
Gecheüber ve unnern Bumm sein Grôb sdedd a Bäng, dou hommer uns hiekhoggd, aweng geward, aweng gegrinna und widder geward. Dann hommer a Kerzla ôgezünd, dann semmer aweng rumgeloffn und dann bi ich zenn Audo und hobb mei Händy khulld, wallich gedochd hou, die hodd mich besdimmd ôgerufm, wallmer doch scho a dreiverdl Sdund dou senn.
Ich souch ze mein: "Dou senn a boer Ônrufe ve ihr drauf, mir müssn sa moll zerügg rufm."
"No, mach hald." Sochder.
"Ka Gudhôhm drauf, ich delefonier doch nedd demidd."
Wieer sei Händy raus dudd, sichder, dess dess dess Fesdnedsdelefon is, ve sein Werdshaus. Dou korrer in 300m Umgreis nuch delefoniern, obber nedd vill weider.
Es woer widder wunderboer!

Sie isdann einfoch her gfoern, wallsa sich Gedangn gemachd hodd. Die gans Zeid hoddsa gemahnd, mir däidn ihr Bescheid gehm wemmer dou senn - es woer hald a Missversdändnis.

Moing du ich wengsdns 15 Euro drauf, merr kô ja nedd wissn, villeichd brauchd merrs amoll.

Biggi