DER BIGGI IHR BLOG

Reise 2

Ich hobbdes Audo bis Frangford schoffierd, dann woer mei Kollechin drô.
Be Wörzburch, Heidingsfeld senn drei Foersburn weche ahner Bausdell auf ahna reduzierd woern und es hodd aweng ann Sdau gehm.
Ôfoern, bremsn, kubbln, und dess immer widder. Auf amoll gidder Kübl aus und konnd nimmer ôgelossn wern.
Mir sdänga groud auf der lingn Seidn, ô der Middlleidblangn. Der Gecheverkehr rauschd ner bluß su ô uns vorbei. Dou könneds ann Himmlangsd wern, wemmer Zeid dezu hädd.
Erschdamoll schieb ich dess Audo gans auf die Seidn, dann basdl ich ess Warndreiegg zamm und laaf demidd auf die Audos zu. Die Fohrerin versuchd inzwischn delefonisch Hilfe ze hulln. Der ADAC sochd, mir solln soford die Bolizei versdändinga, wallmer ô su ahner gfährlichn Sdell sdänga. Dess machdsa ah, obber es kummd kahns. Kold woss und ich konnd goerned su schnell ziddern, wie ich gfrorn hobb. Orôscha (orange) Sicherheidswesdn hommer bluß ahna khobbd und die hodds uns a ned wärmer gemachd.
Su fruh wie mir zwa, senn glaab ich, seldn die Leud, wenn die Bolizei kummd. Und gleich denouch der Ôbschlebbwoung!
Dann hommer dess Audo nouch Wörzburch gebrochd (fer 280 Euro) und der Fohrer hodd uns benn Bôhnhuf rausgelossn. Dou woer groud der ledsda Zuch in unner Richdung durch. Kahns ve meiner Familie is ôs Delefon - ve ihrer Familie a ned. Mir worn ja su ferdich.
Dann hommer uns a Daxi genumma, fer 200 Euro.
Su schö woer Kulmboch scho lang nimmer - wie dann die Lichder ve der Sdodd aufgedauchd sen.

Ich bi widder dahaam. Worum die Leud ford müssn, wenns doch dou su schö is, wassich a ned.

Biggi