DER BIGGI IHR BLOG

Sunndouch

Heud Nammidouch rufm sa mich venn Kino aus ô, sie häddn kanna Eindriddskaddn mehr.
"Schaud hald amoll nein Büro", souch ich. "Mir müssn doch nuch woss homm."
Dou wäirn sa scho zwamoll druhm gewesn und häddn nix gfunna.
"Es muss gleich ahns auf Bareid fohrn und ann Kardong Karddn hulln, wall ich hobb bluß nuch 20 Sdügg", sochd die Kassiererin.
Wallich erschd Urlaub khobbd hobb, wassich nedd ob dess middie Karddn sdimmd, zich mich obber ô und foehr auf Bareid.
Dou iss dann nadürlich kahns, dess gansa Büro is verwaisd, die annern Midarbeider homm a kanna Schlüssl und ich sdi im Bargverboud.
A Kassiererin sochd, sie däid mir ann glann Kardong ôbgehm, obber nedd merrer und eichendlich kenned sa mich ja goerned.
Ich schnabb denn Kardong und renn zenn Audo (wer mich kennd wass, dassich nie renn, obber mir is hald su vorkumma)
Wieich nein Kino kumm, freua sa sich alla, wallsa groud die ledsda Karddn verkaafd und scho auf mich gewardd homm.

Dann bi ich nein Büro und hobbmich aweng beschäfdichd.
Der Vorführer kummd rei und sochd, dass dess heid widder aweng a Aufrechung woer, obber eds hodd ja alles gud geglabbd.

Wieer mich frouchd, wielang su a Kardong häld, dou wer ich sdudsich.
"Mir hommdoch vor mein Urlaub a Lieferung midd vier Kardong grichd, desskô doch nonnich alla sah?"
Und dann:" Woss issn dess fer a Kardong under demm aldn Drugger?"

Dou hommer dann vier nôchlneua Orchinôl Eindriddskarddnsedds gfunna.

Obber su bi ich heud amoll auf Bareid kumma - a a schöna Sdodd.
Ich wass ja nedd, ob meina Midarbeider wolln, dessich aweng raus kumm, odder bluß weid weg ve enna bi?

Biggi