DER BIGGI IHR BLOG

Scho widder Urlaub

Eds woer ich a boer Douch in Dublinn (wie der Einheimische sagt) und hobb kann ahnzinga Rengdrobfm ougrichd.
Ze früh hou ich in der Sunna gsessn, bissich ann ruudn Kubf ghobbd hou.
Es woer midden gansn Giness, einfoch der schönsda Urlaub denn ich bis eds khobbd hou.

Dann hodd in Frangford des Boudnbersonôl gsdreigd und mein Fluch gekännsld.
Kein Mensch ve der Lufdhansa is nôn Delefon, auf alla Nummern wu mers brobierd homm.
Also semmer zenn Fluchhafm und dou woern alla Schalder ve derrer Firma zu und keine Sau, die sich um mei Broblem gekümmerd hädd.
Be der Info soung sa, mir solledn hald zer Air Frônce geh.
Woss willichn be denna, wu ich bluß a englisch Wörderbuch debei hou?
Die homm uns dann neua Delefonnummern gehm - wu dann ah kahns nô is.

Mei Grußer hoddann im Inderned mein Fluch umgebuchd.
Und wiemer mid denn Wisch dann vor der Fraa ve der Lufdhansa sdänga, sochdsa, sie wern ausgebuchd und mir häddn dou ka Fluchbesdäidichung, sondern merrer su a Vorônfrouch.

Dou häddich dann scho kodsn könna, vor allem, weil mei Bu auf die Ärberd mussd und ich dann muddersehlnd allah woer.

Ich häddmich ja a benn Biloudn aufm Baa khoggd, odder be denn junga Fluchbegleider!
Nouch annerdhalb Sdund wingd sa mich ze sich her und sochd, dess a Blods frei worn is und ich derf mied. Dess hou ich su versdandn, wallsa merr mein Kuffer ougenumma und aufs Bônd gsdelld hodd.
Richdich versdandn hoich sa ja nedd - wall die hodd a englisch geblauderd, ko ich dir soung!

Eds bi ich widder dahamm und wall dou die Basswörder eigsbeicherd senn, ko ich a widder nein Indernedd und woss schreim.

Biggi