DER BIGGI IHR BLOG

Kinnergebordsdouch

Ledsda Wochn hommer zwaa Douch hinnera nanner Kinnergebordsdouch gfeierd.
Der erschda woer der Freidouch, dou iss dann nuch gans manierlich zuganga, woer bluß aweng Sdress, wallmer nedd gewussd homm, wimmer dess ôm Samsdouch auf die Reiha gring solln.
Geblôhnd woer, dessmer grilln und im Gaddn sidsn wolln.
Ich hou ja scho Horror khobbd, wall 35 Leud kumma solldn und dann woer ja a nuch DESS Fußbollsbill. Dann isssu kold woern, und renga sollds a.
Mir wolldn im Gaddn ann Fernseher aufsdelln und des Sbill säing.
Dann hobbich obber Angsd grichd, dess mei Fernseher velleichd hie werd, wenn dess Wasser nei löffd.
Also hodd mei Bu nouch ahner "LOCÄISCHN" gsuchd - obber ohna Heggdigg, es woer ja erschd Freidouch Ômbd.
Ich woer scho aweng dorcha nanner, obber er hoddja die Ruh weg!
Er hodd Fernseh gschaud, dann mussder nein Fiddness Sdudijoh und villeichd nuch aweng Basgeddboll sbilln.
Dann hou ich gedochd: MUDDER, dess geddich goernix ô, der iss scho gruß und dess werd scho wern.
Mir senn dann in Neiamargd im Kegelglubb under kumma.
Mei Bu und sei Freund homm a 20 minüdicha Underweisung grichd, wie merr ann Lichdschalder bediend, und dessa in die annern Räum nix verloern häddn, außer sie wolledn a Nummer schiem. (Hodder werglich gsochd und ôhngeblich is dess a genudsd woern)
Dann iss Essn kaafd und vorgekochd woern und ess woer a richdich schöner Ômbd.

Wennich mich dou su raushaldn kô und a nuch bediend wer - dann kömmer des näxds Joehr widder machn.

Biggi