Willkommen auf meiner Webseite!
Weil wir daheim als Kinder hochdeutsch reden mussten, kam ich erst spät zum Dialekt.
Das ist nun meine verspätete Rache.
DER BIGGI IHR BLOG
Zurück zur Übersicht
16.07.2013
Darmsbiechelung
Gans großes Kino
Ich wolld ja nedd nô, obber mei Dogder hodd mich sulang beärberd.
Raffinierder Weis hobbich gesdn Ômbd nuch Dindnfisch á la rabiada - exdraschorf gessn, wosssich heud Moing bidder bereud hou.
Ze früh umma sexa mussd ich ann Lidder Ôbführmiddl dringn, denouch bi ich widder kobfüber nei mein Bedd.
Erschd wolld ich ja nuch Strichla machn, fer mei eingna Sdadisdigg, obber noch fünfmoll hobbich aufgehm. Ich hobbdann die Gloudür goer nimmer zugemachd.
Dann woer die Saafm alla.
Mei Bu mussdmer a neua hulln, gans undn ausm Schrong - ich woer ja su under Drugg und konnd mich doch nedd buggn.
Umma zehna nuch ann Lidder, dou woer ich dann scho richdich ferdich.
Nammidouch bi ich nein Grangnhaus.
Alles mussd ich auszieng, defür hobbich a Hemd grichd, wu hindn offn woer und a Huusn ve der gleichn Machoerd.
A korza Vorundersuchung, dann sochder Dogder: "Jetzt kommt der Sandmann",
und dann hodder mer Brobofol gschbridsd, woss der Meigl Dschäggsn (Michael Jackson) a nuch korz genossn hodd.
Woer nix besonders und dann bi ich widder aufgewachd und hobb zer Schwesder gsochd:" O, o, under mir is ja alles noss"
"Dou braung sa sich kanna Gedangn machn, dess is bluß dess Sbüllwasser."
"No," houich gedochd, "fer a Sbüllwasser is dess zimmlich dreggerd und sdingn duds aa"
Eds wassich wengsdns, dessich heud Nammidouch kann Dormgrebbs hou - kô moing Nammidouch scho widder annerschd sah!
Ich glaab ja nedd ô denn gansn Zirgus, obber dess derfmer nedd laud soung, dou könned mer vielleichd gsdeinichd wern.
Biggi
Zurück zur Übersicht