DER BIGGI IHR BLOG

Zeugnis

Ômm ledsdn Schulldouch dörfm die Kinner mid ihrn Zeugnis neis Kino.
Heuer werd die Maddenoudn belohnd.
Dess haasd, a jeds wu ann Einser in Rechna hodd, derf fer ann Euro ann Film säing. Außer be 3D, dou kumma nuch amoll 3 Euro dezu.
Dess machmer eds scho a boer Joehr und nehma jeds moll a annersch Underrichdsfoch dezu.
Wie ich kumm, sdedd scho a Drembl ve Gunga vorn Kino.
Midd amoll überenna sa uns, wie merrs nonnich khobbd homm.
Gleich drauf is dess Bobbcorn alla.
Ich will Nouchschub hulln - dou gibbds nix - dou is nix dou.
Die Fraa, die defür zusdändich is hodd sich hald verschädsd.
Und die Leud sdänga bis naus, vors Haus und dann nuch nüber bis hindern Nochbern.
Langsam wern sa bambich und sdändich merrer.
Mir könna weider nix, wie bediena, Bobcorn machn und einichermôßn freundlich saa.
Eds kummd a Fraa vem Eingong rei, drängd sich ô dia gansn Gunga vorbei, kummd ze mir ô die Dhegn und will eds soford nei die "Monsder Uni", wall sie däid draußn sdeh und der Film fanged gleich ô.
Su a Büxlmadam, hobbich gedochd, obber nedd gsochd. "Schaun Sa sich amoll die gansn Kinner ô, ô denna Sa eds vorbei senn, die wolln a alla nei. Findn Sa dess nedd ungerechd, dess die sich eds dou ôgsdelld homm und Sie laafn drô vorbei und wolln vorher Ihr Digged?"
Wedder is die widder naus gerauschd. Ich wass nedd ob die sich nuch moll ôgsdelld hodd.
Mir homm a fer nix Zeid khobbd, wall dann woer des Cola alla, dann dess Fanda und su is dess weider ganga. A halba Sdund sbäder hommer erschd die Filme gezeigd.
Obber erchendwie hommers hald gschaffd und alla nuch rechdzeidich nei gebrochd.

Biggi