DER BIGGI IHR BLOG

Leud gibds

In derrer Wochn kummd a Mô ausm Kino 2 raus und fräichd, obber vor der Vorsdellung nuch moll raus kô? "Ka Broblem", sochder Midarbeider ze na und dengd, dess der Gasd villeichd nuch ahna rahng will.
Dauerd nedd lang und der Mô sdedd widder vorn Einloss, mid ahner Blasdigdühdn in der Händ, wu zwa Sdyroborschochdln mid Essn drinna woern.
"Dess dudd merr scho leid", mahnd der Midarbeider ze na, "obber dess Essn dörfm Sa nedd mid nei nehma." "Wisou? Dess mach ich a jeds moll su und dou hodd nuch kahns woss gsochd. Wu issn dou der Scheff?"
"Bi scho dou," hobbich gsochd und er hodd mir scho vo aller Weidn sei Händ endgeche gschdreggd und wolld meina schüddln.
Ich hobb mich vorna aufgebaud und gsochd: "Schaua Sa moll dess grußa Schild ô, vorna benn Eingông. Dess kommer lesn, wemmer rei kummd, odder benn nausgeh. Dou sdedd drauf, dessmer ka Essn odder Dringn mid neis Kino nehma derf.
Er widder: "Ko scho sah, obber dess hou ich eds a jäids moll su gemachd und dessweche will ich dess a heud su machn. Ihr hobbd ja ka worms Essn dou hinna."
"Bluß, wall meina Midarbeider moll ann Fehler gemachd homm, könna Sa sich nedd drauf berufn und dess heud im Sôhl vor die annern Gäsd essn. Mahna Sa, wenn Sa dreimoll besuffn middn Audo foehrn und senn nedd erwischd woern, dess Sa dess eds sdändich dô dörfm?"

Dou hodder dann nix mehr gsochd und sich bedangd, desser sei Zeuch vor der Vorsdellung und vor der Dür essn dorfd.

Biggi