DER BIGGI IHR BLOG

Dabblinn in Irrland

Ledsda Wochn woer ich verreist, auf die grüna Insl.
Kosda nedd meggern, hodd scho gebassd. Dann mussd ich widder hamm.
Aufm Airbord bi ich durch su a Dür durch, weche der Bersonakondroll - dou is scho der Alarm ô ganga.
Wos is dess, hodd mich su a schlechd gelaunda Beamdin gfrochd.
Versdandn hou ich sa scho, khond ihr obber nedd in ihrer Sbrouch Andword gehm.
Mei Hüfdn?, hou ich sa gfrouchd.
Sie sochd, ich solled mich braadbaaned hiesdelln. Und dann fuchdld sa mir denn gansn Körber rauf a nou, mid su ann Dedegderding dou ôbb.
Dess Ding schlächd dauernd aus.
Senn dess meina Huusndrächer?, frouch ich sa und ob ich sa ausziehng soll?
Die hodd mich zegoer versdandn und sochd: "Yes".
Eds gänga diea blödn Drächer obber nedd raus und erchendwie hängd a Drumm ô mein Bullover, wu ich drüber hou.
Ich zich und zerr, hald denn gansn Verkehr auf und aufamoll widschd dess ahna Dahl venn Hussndrächer raus und mid ann Karacho und kann Zendimeder Ôbsdond ô dem Gsichd ve derrer Fraa vorbei.
Ich könnd nedd soung, dessa eds freundlicher gewesen wär.

Aufm ledsdn Drügger hou ich mein Fliecher derwischd - wie immer hald.

Biggi