DER BIGGI IHR BLOG

Reise ans Schwarza Meer

Mir senn eds a boer Douch auf Isdanbul und ôns Schwarza Meer gfoern.
Wie mir in Nermberch ômm Fluchhôfn senn, mussd merr durch die Bersohnakondroll und wall ich kanna Huusndräicher drôh khobbd hou, iss dess a schnell ganga.
Su bald woern mir in unnern gansn Lehm nonnich amm Sdardd und ich hobb scho gedôchd: "Eichendlich langweilich".
Dou schreid auf amoll Ahner: "Halt stehnbleiben. Wem gehört das Messer?"
Ich bi einfoch weider geloffm, ich hou doch nedd gedochd, dess dou mich ahns mahnd.
No hommsa mich fesdkhaldn.
Heiliches, homm die sich ôhgsdelld.
Dess glaana Sbringmesserla hobbich a scho in Dablinn debei khobbd und kahns hoddwoss gsochd! Es woer immer in der Seidndaschn ve mein Ruggsogg.
Demidd machich Brodzeid auf der Ärberd und endführ kanna Fliecher.
Eds mussdmer auf die Bolizei wardn.
Die homm velleichd groud a richdicha Sdrôfdôhd ze gläirn khobbd und sich Zeid gelossn.
Su is dess doch nuch aweng sbannend woern, wallmer nedd gewussd homm, ob mir eds dess Fluchzeuch nuch grieng.

Die woern dann fei werglich freundlich, die zwa Bolizisdn. Ich mussd enna zeing wiemer dess Messer aufschnabbm lässd, und ess a widder zumachn.
Gsochd hobbich nix, obber gedochd: "Mir hommja Zeid"
Nouch aweng hie a her, dorfd ichs nei ann Müllahmer schmeißn und dann hommsa mich widder zerrügg gebrochd.
Wie ich gsochd hobb, dess dou su a schöss Wehder is und in Isdanbul rengds, hodder a Bolizisd gsochd, wenn ich kämed, gänged eh die Sunna auf.

Hou ich gedochd: "Wer hoddn eds des Bier gedrungn, heid Nammidouch?"

Biggi