DER BIGGI IHR BLOG

Zasder, Bulver, Geld

Gesdern bi ich auf die Bong, wolld a Geld eizôhln und a Überweisung eischmeißn.
Midd meiner Kardn bi ich aufm Bargblods neigfohern.
Dann hobbich midder Kardn venn Gschäfdskondo Geld eigezould. Wie ich die Quiddung nimm, is die Kardn nimmer dou - die woer dann im Ruggsogg.
Nocherd nimmich mei brivada Kardn und will Geld ouhehm.
Sochder Audomad, dess die PIN folsch is. Issmer a nonnich bassierd, ko obber sah.
Also, denn Vorgong ougebrochn und nuch amoll, gans konsendrierd mei PIN eigehm.
Sochder widder, dess dess nedd richdich is.
No bi ich gleich ze der Fraa ve der Bong und hobb gsochd, dess dou woss nedd bassd. Ich bi villeichd aweng old, obber ich ko mer doch die boer Zouln mergn.
Dess machd nix, sochd sa, gehm Sa mer moll ihr Kardn, ich seds denn PIN zerügg und dann brobier mers nuch amoll, middananner.
Wie ich denn PIN eigibb, schaud sa disgred auf die Seidn.
Gidd widder nedd.
Naja, mahnd sa, kumma Sa moll midd zenn Schalder, dann sdell ich Enna a Kärdla aus und Sie könna sich des Geld ômm Audomadn raus lossn. Und dahamm schaua Sa moll nouch wie Ihr PIN eichendlich is.
Mei Geld houich grichd, dann hobbich nuch die Kondoauszüch khulld und bi durch die Schrangn widder naus gfohern.
Dahamm hobbich mir erschd amoll a Brilln aufgsedsd und die Auszüch gelesn.
Dou konnd ich dann gans brima säing, wie ich Geld aufm Gschäfdskondo eigezould hobb und dann mid der Hilfe ve der Bongongsdelln widder Geld runder hobb.
Dou konnd ja der PIN nedd bassn. Ich hobb einfoch die zwa Kardn verdauschd.
Eds hodd obber dess Geld fer die Überweisung nedd gelangd und ich mussd nuch amoll neifohern, mei Geld auf dess ahna Kondo eizohln und venn annern widder rou dô.

Demidd ich dessmoll kann Fehler mach, hobbich midd Edding ann schwarzn Bungd auf mei Kardn gemould. Eds ko ich die zwa, a ohna Brilln nimmer verwechsln.

Biggi